L'Amuravela 1965
29 de junio de 1965Recitada por
Juan Luis Álvarez Bravo “Totó”
En el nombri de Jesús
y la Virgin Soberana,
vou ichar l’Amuravela
comu San Pedru asperaba.
¡Santu ya Excelsu Patrón
ya de la Gloria Porteru,
de magar fusti y has ser
muy veneráu en Cuideiru!
Cada añu vian más xintíu
a faceti acatamiantu,
peru lus que más t´envocan
siampri han ser lus mariñeirus.
Nada mus falta, Patrón,
en tiniandu el tóu rimediu;
de “vagas” ya maremotus
en paz ya en gracia saliamus.
Tuviamus una galerna
qu´azotóu todu´l mar cántabru,
qu´anque nun causóu disgracias,
feixu pérdidas ya dañus.
Ahora sí, que, vou diciti,
las folas iban de miadu,
amontaban lus dos muallis
qu´amenazaban tragallus,
subripasandu hasta El Sabli.
En´a Tabiarna del Puartu
intrábanti ya salían
que daban pavor ruxandu,
ya hasta diantru, ¿guais?,
saltaban piadras de diez kilogramus;
a poucas pa Engalaterra
fan, sin querellu el trespasu.
A las cuatro la mañana
taba´l puablu alborotáu,
subiandu todas las lanchas
pa ponellas al risguardu;
llenaban toda La Plaza
comu nun si tian ricuardu.
L´iviarnu tuvu zurrucu,
nun ya que fuara muy malu,
peru con tanta xelada
lus peixis fundían pa baxu
ya tuviamus bian de mesis
paráus de brazus colgandu.
Pa que puadas dati cuanta
de lu destáus que ya tábamus,
bástati ver que el “Rio fríu”
dicidíusi a ichar el rescu,
ya Quilinu “Cordelera”
salíu pescar al palangri
pa ganar algunus cuartus.
Falaréi de las costeras
pa que quedis enteráu:
La de bunitu pasada
foi bona, gracias ti damus;
la de bisugu, a la enversa:
bian poucu o nada pescamus;
d´ardora, tamus contentus,
qu´abundus milis partiamus;
a algunus un is pintóu bian,
peru fuarun bian iscasus.
De baxura, hubu mirluza
de sobra pa contentanus,
ya dispuás la palometa
en cantidá la tuviamus.
Tamus en tiampus, San Pedru,
tan muvíus ya tan varius,
que nada de lu que pasa
paez acunticimiantu:
Fansi ya desfansi puablus;
por unas cuantas pesetas,
mercas un coheti d´esus
pa que llova lu que queras
en sin medación del cialu.
¿Qué ha dicir San Isidru,
que i quitan el sóu gubiarnu?
Nun ya pusibli acotar
lu que pasa en Universu.
Ya con tantu rigolver
ya tantu rivirimiantu,
tan del todu embelecáus
esus vironis del tiampu:
N´utubri nacin las floris,
venu gran bochornu en marzu,
por contra tuviamus fríu
nus mesis d´abril ya mayu;
lus elimentus nun rixin,
andan cabeza con rabu.
Vou contati las vesitas
qu´esti añu ricibiamus,
imprincipandu, ¿güisti?,
po la de más altu rangu,
po las altas xaraquías,
que fuarun lus Reis Magus.
La llegada foi por Pozu,
ya en una “carroza-autu”;
paemi entermedióu Miteriu
que ha tener valiamiantu
con esus grandis xerarcas;
si vus veis n´algún apriatu
habéis acudir a él,
que bian sabrá´l ortiantavus.
¡Muy guapus taban lus Reis!;
ya de lus tres, el más viayu,
iba el que tinía más gracias;
el bian quiría falanus,
peru el probi, a paecer,
floxeaba en el pixuatu.
¡Muchu si rían lus neñus,
ya lus grandis cuasi tantu!
Dispuás nun lus vimus más,
sumiárunsi en sin notallu.
Mandamasis ya touristas
muchus al puablu arrobarun;
algunus iban d´encónitu,
sábislu desqui marcharun;
nun ti puadis isficiar,
tianis que falar con tiantu.
Las muyaris, a las vecis,
dan la llingua isbalastrandu,
ya cuandu van dasi cuanta,
ta una Otoridá guyandu.
Asina pasóu, Patrón,
nun painsis Tú que ya cuantu;
ahora que la que falóu
supu tenesi en sou puastu,
nun si acobardóu nin plizca,
ya lu que taba faláu
asiguróu qu´iba ciartu,
que si si fan cousas bonas,
hay tamián d´algún intuartu.
Del Estitutu que llaman
de La Marina, po´l vranu
venu el siñor diritor
pa venus ya pa falanus.
Al dicíi un compañeru
lu de las obras del puartu,
dixu que taba´l menistru
con el puablu algu destáu.
Nun tian razón, que nusoutrus
bian al menistru apreciamus,
ya en´a palabra que dióu,
anque tardi, cunfiamus,
porqui amás lu que pidimus,
ya xustu ya nisizariu,
nun ya cousa de turismus,
nin d´adornus nin de xuagus,
ya´l bianistar ya´l sostentu
ya la riqueza del puablu.
Si nun quiarin ou nun puadin,
al menus dibían deixallu
en´a mesma situación
que taba fai trenta añus.
En el sitiambri pasáu,
otoridadis ya puablu
a vesitar La Santina
ya llevar la ofrenda fuamus
con divución ya con fe
au tuvu el rey don Pelayu.
Más de venti pixuatinas
co lus trajis asturianus
ya más guapas que la pólvura
fixarun bailis ya cantus;
tan bian, ¿güisti?, lu fixarun,
que hasta el siñor Arzubispu
que las tuvu contemplandu,
diois la filicitación
ya aplaudíu con intusiasmu,
a más, bindición ixpresa
pa todus lus qu´allí tábamus.
Primeramenti n´a misa,
co lus sus pañualus blancus,
paicían palumbinas
cuandu al Siñor ricibiarun.
A La Santina tamián
alligrárunsi lus guayus
al güir el Temperendengue,
las Danzas ya´l Perlindangu.
Fixárunis bian de afoutus.
¿Aú tan, que nunca las viamus?.
La Fiasta del Pescador
tian más augi cada añu:
siati días de cuntinu
de misas ya de rosarius,
aparti d´esparcimiantus
pa neñus, mozas ya viayus.
Ya ya de catiguría
el “Coru de lus pixuatus”,
que de tres ya de cuatro vocis
iban entonáus lus cantus,
iligíus ya dirigíus
por el nuastru cura párracu,
que ya´l alma ya´l motor
de todu lu buanu en puablu.
De Xixón varius chavalis
unas milunías tocarun
d´esa múxica moderna
que llaman “rumbus de viantus”,
ya diálagus d´unu solu
faláus en babli asturianu.
El que anonceaba iba Adolfu,
simpáticu ya dispiartu;
pa ser ispikir n´El Congu
paemi lu sulicitarun,
peru dixu que nun vei
porque son antropofagus.
Tamián en bar del “San Xuan”
hubu pa lus xubiláus
cuncurso de xuagu al tuti
que Florentu ya´l Chispeiru
fuarun lus que lu ganarun,
todu a la Lley, esu sí,
en sin trampas nin engañus.
Lus neñus ganarun premiu
con debujus ya pintandu
en sin muastra nin papel
de lu qu´ellus taban viandu.
Rispitivi al “Cuadru Artísticu”,
n´esu tamián damus palus:
aquí, n´Arena ya´n Murus,
munchu xintíu y´aplausus
(Cáimi de la barba el sen
ya nun puadu apñonderallu).
Ha siguisi la turnea
po lus puablus comarcanus,
qu´hemus cunsiguir más fama
que lus “biatlis” inglesanus.
En Pravia tamban lus “quinquis”; l
us probis de lus pravianus
nun puadin salir di nuachi, t
an todus ispavoráus;
nun faigáis más canandarius
que ya ta todu isplicáu.
Qu´esti rincunín ahora
“anda a floutu” ya muy ciartu:
sellus de Correus, postalis,
y´an sobris ves a Cuideiru;
tamus “al ultra”, hau güir,
con tantu adelantamiantu;
ya si ya de rivirsionis,
nun podemus dar abastu:
treatru, cantus ya cinis,
la tilivisión ya´l radiu.
Hay toda clas d´enseñanzas
pa pequeñus ya midianus,
ya tamián pa lus adultus
que si llaman nuturnáus,
ya de corti ya de bordi,
de llambiadas ya guisáus.
Hay las “crátidas andantis”,
qu´esas vianin insiñandu
a guiar lus otomóvilis
a homis, muyaris y´antrambus.
Formóusi la Acción Católica,
que ta devedida en ramus,
co las ramas ya raminas
sigún lus sexus ya añus;
¡dispuás diránnus, Patrón,
que falta “iscultura” en puablu.
Nun quiaru diciti nada
si miramus pa outrus lláus.
Hay partíus de fugolis,
balón-piasis, balón-manus,
creiquesis ya besibolis,
ya tamián de balón-paxu,
carreras de becicletas,
de globus ya de caballus,
ya comu tantu llovéu,
haberalas de llimiaus.
De lus cambius en´a Ilesa
has tar Tú más enteráu,
que con el tóu sucesor
siguru tarás d´acuardu.
La Misa dícisi ahora
de cara pa lus que tamus,
ya en vez de falar latín,
fálannus en castellanu.
Nun séi si acasu San Xuan
tará un misgaín destáu,
porqui el postrer Evangeliu
de la misa suprimiarun;
ya que la xanti tian priasa
y´asina cábasi lluáu.
La Semana Santa foi
con abondu llucimiantu:
pa confesar ya sirmonis
dos bunus flairis viniarun.
La prusición más llucida
tuvu la del Santu Intiarru;
como llovéu, non salíu
nin si cantóu el Calvariu.
Las misas ya cumunionis
el Xuavis ya Viarnis Santu,
igual que la de dinuachi
de Risurreición el sábadu,
tuviarun muy cuncurridas,
¡iba un xintíu disiartu!;
peru, ¿qué quiás que ti diga?,
hay poucu ricuimiantu;
nun séi si son las riformas
de “lijurgia” que fixarun,
ou que con el mudirnismu
ya nun hay la fe d´antañu,
porque lu que manda´l Papa
ha ser siampri lu más cuardu.
Va faési el mes que vian,
pa vesitar a Santiagu,
una pirigrinación
de mozus, ya outra de viayus,
cumprindiándusi las féminas
del unu ya´l outru bandu.
Has dicíi lus arriciba
con amor ya con agradu;
tian que tar agradicíu
que aquí acupa el Tóu puastu.
La “Fiasta la Mocedá”
foi cillibrada esti añu
con cuncursus de la yenka,
fugol ya bailis ya xuagus;
rispitivi a mudirnismus,
tamus en primeira puastus.
En el primeiru d´abril
pasóunus aquí esti casu:
qu´en ver de llovenus agua,
caéu azufri de lu altu;
en pucinus ya en pozonis,
vióusi el pulvín amariallu;
outrus dicin qu´el azufri
tian que tar crestalizáu,
peru, sea lu que sea,
estu foi algu d´ixtrañu.
Nun séi si serán la causa
esus humis “astronatus”
qu´andan dandu viragualtas;
dos y´andarun po´l ispaciu,
saliarun de la casulla
amarráus sólu po´l rabu.
¿Qué ti paez, San Pidrín?…
A mi dami tufu al diañu.
U tamián pudieran ser
chinus desfaraguyáus,
d´esus que mata el “Miau-Setú”
que son milentas de ciantus.
En esti mundu modernu
ahora todus son muy sabius.
Salomón iba, mióu probi,
en comparanza, un pezapu.
Lus neñus sabin de aú vianin,
sabin “el cómu ya´l cuandu”,
lus grandis mandan nu´s padris, ´
que dicin tan anticuáus,
ya éstus andan incuíus,
cuasi, cuasi is tianin miadu.
Dispuás didican un día,
dicin lus fíus pa honrallus,
ya fanis un rigalín
p´asina más enfuyallus.
¡Si el honrar padri ya madri,
non ya un día, que ya a diariu!
En sin dolor ya con múxica
son ahora lus nacimiantus,
comu sacaba las mualas
aquel dintista afamáu
que lu llamaban “El Llobu”
ya vinía con un xiblatu;
nun hay que mentar la “guala”
porque por mor l´aparatu,
sigún las munigrafías
fansi muchus más “encargus”.
Las modas siguin “escenas”,
lus moñus de rascacialus,
las milenas po la cara
u puarco-ispinus rigualtus,
ya pa entamar la cabeza,
las vendas ya lu más guapu.
Lus gorrus fuarun la mapa
de la moda n´esti iviarnu,
húbulas de toda clas
ya de coloris vareáus,
algunus forma cazuala,
outrus acolocotráus,
unus, mangas de café,
vasus de nuachi embocáus,
d´algunus n´a cocotera
ya outrus con moutas al llau.
Sayas de cuarta ya media
co las rudías al frescu,
si si gachan… ¡pa quéi más!…
¡válgami el Siñor San Pedru!
Lus calzonis van en augi,
dati igual fema que femu.
¿Ya lus homis, Santu Hermosu?
¡Estu si que ya lu malu!:
van comu mitíus en tubus
con esus calzonis priatus
u bragas comu lus neñus
con milenas dispiláus,
lus jersés con ruquilorius,
uñas ya llabius pintáus.
¿Nun ves qu´en París de Francia
ya tuviarun disfilandu
maniquisis mascolinus
con meneus prisumiandu?
Estu, pa mi, ha ser pior
que lus barbudus de Castru.
Hay una novedá nuava
n´esti añu n´us patarrabus:
que nun llegan a la cuarta,
dos didas más incuyarun.
Ya si iban poucu las playas
pa ponesi casi en cuarus,
van faciandu más pescinas,
que son pozonis de sapus.
A una tourista de esas,
de bikini ya descaru,
mitiói un pez un plizcón
que salíu más que gufandu,
ya foi tar co la Xusticia
pa que i reparara´l dañu.
¡Tan lus pecis endináus
con tantu disnudamiantu!
Tamus muy floxus, San Pedru,
la carni non la aprobamus,
d´algún que outru coneju
o un pullín cuásiqui naniu;
que saquis “gula” ou que non,
fas vixilia todu´l añu;
¡mi ánicas!, vamus cabar
en flairis carmilitanus.
¿Ya las siñoras indianas,
que valéu el kilogramu
a ochu ya nuavi pesetas
ya bian poucu más baxarun?
Lu demás subíu al tenor;
por esti camín que vamus
non mus queda outru ricursu
qu´aprietar el estomágu.
El “alcanfor” de las casas
todu si vei completandu,
con neveras frigulíficas
ya comu un espéu en sualu;
alredor las cincu mil
costa, ¿guais?, el barnizallu;
outras puanin d´esas chapas
que son d´adornar palacius.
Peru lu que más rivira
ya mus trái en sin sosiagu
ya la novela “La entrusa”,
va pa seis mesis lu menus.
Nun hay bar, casa nin frábica,
desde Cuideiru hasta Uviadu,
por radius ya transistoris,
que nun si tea guyandu;
nun si guisa nin si cuami,
nin fas llabor de cunciartu,
n´as tiandas nun si dispacha,
nin lladrar puadin lus perrus;
si nun si termina lluáu,
d´alguna enferma de feichu.
Nun hay Cumisión nombrada
que naidi quiar esus cargus;
ya prisidenti el Alcaldi
y´asisoránlu unus cuantus.
Las chavalas ya chavalis
son lus que ricaudan cuartus;
nun serán fiastas llucidas
porque nun si ta d´acuardu.
Tan dos orquestas: La Montis,
ya La Flurida gallega,
que s´istrena n´esti puablu;
xigantis ya cabizudus,
gaitas ya tamburileiru,
ya todu esi batiburrillu
de tómbulas y d´istruandus.
La iluminación del Topu
ha llenanus de llucerus.
Bian quiriríamus, Patrón,
honrati con más esmeru,
nun da la manta pa más,
que lus gastus son excesus;
peru, esu sí, l´alligría
ha rebosanus el cuarpu;
pa blincar ya rivirtisi,
nun lu hay comu Cuideiru.
Han bellasi “Yenkas”, “Penkas”,
el “Cuándu”, el “Cómu” ya´l “Menus”,
todu de la nuava fola,
que hay que tar a lu modernu.
Pidu la Tú bindición
comu ya de reglamentu,
antis d´emprimar lus vivas,
que vou facellu ahora mesmu:
¡Vivan San Pedru, San Pablu,
ya lus onci compañerus!
¡Que viva outra vez Santiagu,
qu´esti añu ta´n candeleru!
¡Vivan todus lus que tan
en´us altaris ya´n Cialu!
¡Vivan las Otoridadis!
¡Vivan lus que tan baxu,
lus d´inriba ya d´enmediu!
¡Viva todu el zurriburri
que menaza lus festejus!
Vou dar un ¡viva! muy altu
a Concha, de la Central,
que sirvíu muy bian al puablu.
¡Outru viva a La Llanera,
que a San Antoniu el Paduanu
punxui la sóu bandirina
pa que si viara en teáu!
¡Que vivan lus forasterus,
mijicanus y´astronatus!
¡Vivan la Tilivisión
ya la Prensa ya la Radiu!
¡Ya viva la nuastra copla
que ya la que nus da aliantu!:
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODOS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!
